زينب بكـت
قشت دموع العين درر
و فوقه انتكت
نامت موشحة بالهموم
نامت متمسحة بالحزن
تلعن ابو هذا الزمن
حلمت بانو الحال صبح
لا دمعه لا هم لا حزن
شافت وشي الاطفال سمح
و فرحاني مبسوطه السحن
هـب النسيم و الدنيا غيم
و فارد جناحينو الوطن
زينوبة حلمت بالحزن
و من يقرا وش الناس يظن
انو الفرح طارح الوجوه
لكن تأكد يا ولد
لكن تأكد يا بلد
انو السعد فارق شرد
و انو البلد ما هي البلد
و زولاً يلاقيك منشرح
لابد كاتم كم جرح
و الليل يغتي اعتى الجبال
و الليل ستر
و الحاله ابداً ما بتسر
زينب تهضرب
قام صحت
النوم طفش كب كوعت
قعدت تحسب في الديون
و بان الصباح شرقت شمس
زينوبة غرقت في الظنون
كيف داير تسوي شنو العمل
اما السجون او الجنون
كان ده المصير ما ليها حل
و اتوكلت و قالت يحلها ربها
و كانت تخش في خشها
عجلاني جابت قشها
و صدت تضاير في العقاب
و القمرا كانت وشها
زينوبة لا ام لا ابو
و زينوبة راح من كم سنين
خلاها ودع كان شبو
و الناس زمان ما بيلعبو
بالبركة عايشين في نعيم
لا تعبو يوم لا جقلبو
و كانت حلال اللقمه و الجغمه الزلال
و كان المحال و مافي احتمال
الحال يقودك للسؤال
عزة نفوس مغروسة بين اسمى الخصال
هل لا تزال
هل لا تزال
كان ده السؤال
الحيره و كم مرة كم
في راسا جال
و وصلت اخيراً لاقتناع
و ان قلنا ما سراً يزاع
انو النفوس صارت تباع
و ملت الخساسات البقاع
و العدل ضاع
و القوة باتت بالورق
كان هولو او كان انسرق
اتقاسمو الخلفا النبق
و ديل ما بيعرفو انو الله حق
مرقت عنيقريبا العصير
سرحت بعيد
تمشي الصعيد
اتراجعــت
الحاله فيها اخير هنا
و سمعاني بحالا الدني
قالت تسوي شنو ان بقت
زينوبة كانت في الصعيد
كانت تشوفلها توب جديد
لو شدة من جارها البعيد
تقشربو و ابداً ماهو عيب
تتحين اوقات المغيب
و بوقفة في طرف الزلط
ترجع متمسحة بالورق
من دون عرق
من دون غلط
استغفر الله العظيم
الناس ذئاب
و كل الدواهي من الحريم
لكن سؤال
مين السبب ؟؟
و ايه البخلي الأنثى تصبح كالدهب
مجلوبة للبيع و الطلب
زينوبة لعنت في العلن
الله يجازي الكان سبب
و كانت نست انو التعب
هداها و الهم و الزمن
انترتعت وقعت بكت
ضحكت براها و علقت
تضحك تخم ايدا التراب
تضحك تكندك في الشعر
زينوبة يا الكانت قمر
جنت كما جن البقر
تسكت تقرقر يا سلام
كان فاتبها الفوات دفر
طش العقل هتف القلب
الله يجازي الكان سبب
ملعون ابو الكان السبب
ملعون ابو الكان السبب
ملعون ......
موضوع: قصيدة زينوبـة - للشاعر اسامة السعيد 
الخميس ديسمبر 01, 2011 12:09 am