تعالي في عيدي هنيني
تعالي العيد يكون جنه
نعيش أيام هنى و نشوة
و ندوم في ريدنا نتهنى
كتير بتذكر الأيام
وكت شادينا يتغنى
و أعيش اللحظه و اللحظات
سعيد و انا ليك بتمنى
هواك انا شايلو في الأعماق
صبور راجيك و بستنى
و قليب مرهف كتير الشوق
محال من ريدو ما ونا
حبيب فتح القليب لهواك
و ما داير الثمار تجنى
و عايش برضي في الأحلام
و حلمي بشوفو مني دنى
بحور أمالنا تصبح دُر
قريب في الشط تكون سفنه
تشوفي حريري في الأيدين
و أشوف في أيدك الحنه